Qytetarët në Ballsh janë shqetësuar mbrëmjen e kësaj të enjteje nga një mori dritash të fuqishme që kanë ndriçuar qytetin.
Në një video të publikuar nga JOQ, shihen dritat e fuqishme qe pothuajse e bëjnë “natën-ditë” në pak minuta dhe i përngjajnë atyre që pasojnë shkëndija elektrike.
Më pas është mësuar nga OSHEE se shpërthimet kanë ndodhur në kabinat elektrike në zonën e TEC-it, pranë uzinës së Ballshit.
Tre kabina elektrike kanë shpërthyer pasi janë djegur transformatorët duke lënë pa energji elektrike gjithë qytetin e Ballshit dhe disa fshatra përreth.
Ish-rafineria e naftës ka marrë disa herë flakë në të shkuarën duke rrezikuar edhe jetën e punëtorëve aty. Edhe pse rafineria ka dalë jashtë funksionit, rreziku për një zjarr të mundshëm mbetet konstant edhe për shkak të rrjetit të vjetëruar elektrik.
