Kryeministri Edi Rama la seancën e Kuvendit pas fjalës së mbajtur aty këtë të Enjte.
Nga deputeti demokrat Luçiano Bocci kërkoi që seanca të ndërpritet. Ai tha se kreu i qeverisë nuk iu përgjigj pyetjeve të opozitës.
“Në fillim të seancës deklaruat që kemi bashkur tre çështje bashkë për një temë që ishte debati, interpelanca dhe parashtrimi i pyetjeve. Rregullorja e Kuvendit në nenin 95 për pyetjet e përcakton qartë sesi bëhet seanca e pyetjeve, dhe i pranishëm duhet të jetë kryeministri këtu, dhe për mocionin me debat, se debati nuk është monolog, është debat. Ka palë. Duhet të ishte kryeministri këtu, dhe për interpelancën duhet të ishte kryeministri këtu. Seanca e pyetjeve ka rregullat e veta dhe neni 95 e përcakton qartë. Dorëzohet me shkrim, çdo deputet e paraqet pyetjen e tij me argumenta dy minuta, dhe është kryeministri ai që jep përgjigjen. Ju lutem shumë, ndërpriteni seancën deri në momentin që të vijë kryeministri. Nuk është normalitet në anormalitet, sepse u bashkuat bashkë, bravo ju qoftë! Por tani çfarë po bëni ju, show? Gallatë? Gallatë me tre çështje dhe iniciativa të rëndësishme? Për interpelancën e dini shumë mirë ju që duhet të jetë vetë kryeminstri pas fjalës 20 minuta, dhe parashtrimit 7 minuta. Si mund të vazhdojë kjo seancë false dhe show“, tha ai.
Drejtuesja e seancës Lindita Nikolla ishte e një mendimi tjetër.
“Pyetjet i parashtroi zoti Berisha, morët përgjigje, tani kemi nisur debatin”, tha Nikolla, e cila ia kalojë më tej fjalën kreut të grupit parlamentar socialist Taulant Balla.
Kuvendi po zhvillon sot seancë plenare, ku në rend ditë është debati për çështjen “Mc Gonigal”.
