Ambasadorja e Shqipërisë në Greqi, Luela Hajdaraga ka shkuar pasditen e sotme në zonën e Larias ku ndodhi aksidenti tragjik mes trenit të pasagjerëve të linjës Athinë-Selanik dhe një treni mallrash.
Pasi u ndal në vendngjarje, ajo foli për mediat për aksidentin që u mori jetën 40 pasagjerëve duke thënë se nuk rezulton që të ketë shqiptarë në mesin e viktimave.
Por, diplomatja shqiptare nuk e përjashtoi mundësinë që nga aksidenti i ndodhur në orët e vona të së martës të ketë edhe shqiptarë mes trupave të pajetë, pasi 38 viktima sipas saj janë ende të pa identifikuara.
“Për momentin që ne po flasim akoma operacionet e kërkim-shpëtimit janë duke vazhduar punën e tyre, kështu që në këtë moment ne nuk mund të flasim për shifra të sakta. Ajo që ne dimë nga autoritetet greke, është se në total kanë qenë 347 pasagjerë që kanë udhëtuar drejt Selanikut, prej të cilëve 72 janë ata të cilët kanë pasur dëmtime dhe midis tyre, kanë qenë dhe janë ende në gjendje të rëndë, në reanimacion 6 persona. Gjithashtu kemi edhe 38 viktima në këtë moment, të cilët janë akoma të paidentifikuar, për shkak se familjarët e tyre ndodhen pranë spitalit ku dhe unë ndodhem në këto momente dhe po japin ADN-në e tyre për të identifikuar në orët në vazhdim viktimat”, tha ajo.
Ndërkohë, ambasadorja zbuloi se dy nga të plagosurit shqiptarë që ndodhen në spital, janë në gjendje të rëndë.
“Sa i përket shtetasve shqiptarë, unë kam vizituar 3 familje që ndodhen në këtë spital. Njëra nga vajzat, 20 vjeç, është në gjendje të mirë shëndetësore, ka kaluar një operacion. Dhe kemi edhe 2 shtetas të tjerë që janë në gjendje të rëndë, në reanimacion”, zbuloi Hajdaraga.
Kujtojmë se aksidenti tragjik ndodhi ditën e djeshme pak para mesnatës në Greqi, teksa të dy trenat u përplasën duke shkaktuar një zjarr të përmasave të frikshme, që u ka marr jetën kryesisht udhëtarëve në vagonat e parë.
Tragjedia shkaktoi edhe dorëheqjen e ministrit të Infrastrukturës dhe Transportit në Greqi, Kostas Karamanlis, i cili mori përsipër të gjithëë përgjegjësinë për dështimin e strukturave shtetërore në shmangien e këtij incidenti me kaq shumë viktima.
