Një avion i “Air Albania”-s, ka bërë ulje të detyruar në aeroportin “Nënë Tereza” vetëm pak pasi ishte ngritur në fluturim.
Në një denoncim të mbërritur në redaksinë e Boldnews.al, bëhet me dije se avioni i linjës “Tiranë-Malpensa”, i cili është ngritur nga pista rreth orës 22:00, është goditur nga rrufeja, e si pasojë piloti është detyruar të bëjë ulje emergjente.
Duke iu referuar mesazhit të njërit prej pasagjerëve, bëhet me dije se teksa kanë qënë në ajër ata kanë parë goditjen nga shkarkesa elektrike, po ashtu kanë parë dhe zjarr, ndërsa kompania u ka kërkuar të vazhdojnë udhëtimin me të njëjtin mjet fluturues.
Po ata nuk kanë pranuar sepse sipas tyre avionit nuk i është bërë asnjë inspektim.
“Sapo u ngritëm nga pista e aroportit të Rinasit rreth orës 20:00 me destinacion aeroportin e Malpenes në Milano të Italisë. Avioni sapo ishte ngritur në ajër ku u godit nga rrufeja“,- tregon një pasagjer për Boldnews.al.
Sipas pasagjerit, pas uljes emergjente punonjësit e kompanisë i kanë njoftuar se udhëtimi drejt Italisë do të vazhdojë me të njëjtin avion, por pasagjerët nuk kanë pranuar.
“Ne nuk pranuam të udhëtonim me të njejtin avion pasi nuk ndihemi të sigurt. Ato pak momente që ishim në ajëer ne pamë edhe flakë në avion”, tregon një tjetër pasagjer.
Por sipas tyre, kjo është e vetmja zgjidhje që kompania iu ka ofruar. Ose të vazhdojnë udhëtimin me të njëjtin mjet fluturues ose të kthehen sërish në Tiranë.
Shumica e pasagjerëve janë detyruar të kthehen sërish në Tiranë për të gjetur një tjetër zgjidhje, pasi kompania nuk iu ka ofruar një avion tjetër ose riburisim të biletës.
Fatmirësisht nuk ka patur njerëz të lënduar, ndërsa ky nuk është rasti i parë që kompania “Air Albania” përfshihet në skandale.
