Mungesa e fuqisë punëtore po kthehet gjithmonë e më tepër në një sfidë për ekonominë shqiptare, aq sa shumë biznese, kryesisht të vogla e të mesme, duket se janë në emergjencë për mbajtjen në këmbë të aktivitetit të tyre.
Tkurrja e popullsisë dhe plakja çdo vit e më shumë, por edhe emigracioni masiv i të rinjve në 10-vjeçarin e fundit ka krijuar një situatë të pamenduar më parë në tregun e punës.
Zona të tëra në vend po boshatisen, ndërsa Tt gjithë anëtarët e shoqatës së prodhuesve kanë mangësi për të gjetur fuqi punëtore, jo në anën administrative por në pjesën operative të punës.
As “importi” i punonjësve nga vendet e treta si Bangladeshi apo Pakistani nuk ka rezultuar efikas, pasi përveç kostove të larta, këta punëtorë më tepër e përdorin Shqipërinë si vend tranzit për të emigruar në Europë.
Më parë tregu kërkonte më së shumti punonjës të kualifikuar, ndërsa tashmë kërkesa është në rritje për plotësimin e vendeve vakante që nuk kërkojnë një diplomë, apo që i përshtaten më së miri punëkërkuesve të papunë që nuk kanë formimin e duhur.
Në faqen e saj zyrtare, Agjencia Kombëtare e Punësimit dhe Aftësive ka të listuara 1577 vende të lira pune nga biznese private, por edhe institucione shtetërore në të gjithë vendin.
Ajo çka merr vëmendje kur i hedh një sy listës së vendeve vakante, është fakti se shumica e pozicioneve nuk kërkojnë një diplomë apo kualifikim të posaçëm.
“Punëtor lavanderie; shitës në dyqan; punëtor pastrimi; sistemues malli; roje; picajol; punëtor lavanderie punëtor ambalazhimi; punëtor krahu; punëtor paketimi; punëtor i vendosjes së etiketave me makineri; magazinier; shofer autobusi; recepsionist; sanitar; punëtor krahu pyjesh; fermer blegtorie; rrobaqepës; kamarier; banakier; hidraulik; marangoz; punëtor në baxho qumështi; motorist; tapicier”, janë kategoritë ku tregu vuan më shumë mungesën e punonjësve.
Kjo listë reflekton atë çka shohim thuajse çdo ditë në Tiranë ku shumica e kafeneve, dyqaneve të vogla, picerive e madje lavazhove, kanë në dyert e tyre të ngjitura njoftime ku kërkojnë punëtorë.
Madje shumica e punëdhënësve i kanë ulur edhe pritshmëritë duke mos kërkuar as eksperiencë tek aplikantët, duke marrë përsipër në një farë mënyrë edhe trajnimin e tyre në vendin e punës.
Gjithashtu, në këtë faqe janë të listuar edhe pozicione që kërkojnë arsim të lartë dhe eksperiencë, siç janë infermierë, mjek, inxhinierë kompjuterësh; specialist i teknologjisë së informacionit dhe komunikimit; kontabilist; inxhinier druri, etj.
