Shtetësja ruse Svetlana Timofeeva, e cila u vu në pranga pas incidentit në ish-uzinën e përpunimit të armëve në Gramsh, ka dalë sot sërish para togave të zeza në Gjykatën e Elbasanit.
Gjyqi ndaj “spiunes ruse” këtë të premte nuk kishte të bënte me procesin e ekstradimit pasi Ministria e Drejtësisë dha garanci se ajo nuk do të përndiqej nga Prokuroria e Përgjithshme në Moskë, por për akuzat që janë ngritur ndaj saj në Shqipëri.
Timofeeva aktualisht është e paraburgosur nën masën e sigurimit “Arrest në burg”, e arrestuar për spiunazh në Shqipëri para tre muajsh, ndërsa Rusia ka kërkuar ekstradimin e saj.
33-vjeçarja këtë herë u paraqit para gjykatës me kërkesë të Prokurorisë, e cila kërkon zgjatjen e afateve të paraburgimit. Por kjo kërkesë e organit të akuzës është kundërshtuar nga mbrojtja, që argumenton se Timofeeva ka kaluar afatet e paraburgimit dhe duhet të ishte liruar nga burgu.
Gjykata e Elbasanit sakaq ka pranuar të shqyrtojë kërkesën e Prokurorisë për shtyrjen e afatit të masës së sigurisë për “spiunen” ruse.
Kjo ka bërë që pala mbrojtëse të kërkojë përjashtimin e gjyqtarit të çështjes, por duke marrë në konsideratë faktin se dosja e uzinës së Gramshit ka për gjyqtare kryetaren e Gjykatës së Elbasanit, kërkesën për përjashtim duhet ta shqyrtojë Gjykata e re e Apelit në Tiranë. Në të tilla kushte është ende e paqartë se çfarë vendimi do të marrë drejtësia për Timofeeva-n.
