Verdikti për “vulën” e Partisë Demokratike do të jepet në Gjykatën e Apelit në datën 3 mars, të njëjtën ditë kur Sali Berisha ka thirrur një protestë kombëtare në bulevardin “Dëshmorët e Kombit.
Drejt kësaj date duket se ka shumë gjasa që PD të shkojë e ndarë në dy grupe siç edhe ka qenë deri më sot, por sipas deputetit Saimir Korreshi mes palëve ka patur kontakte për të bërë të mundur bashkimit.
Deputeti i PD për Lushnjen tha në emisionin “KAFE SHQETO” se grupi parlamentar demokrat ka qenë drejt bashkimit, por vendosja e Apelit për të shqyrtuar çështjen e “Vulës” më 3 mars ka bërë që palët të tërhiqen sërish dhe të presin vendimin final.
“Unë mendoja dhe gjykoja se do të kishte një dakordësi dhe një ulje armësh që po ndodhte në vijimësi por që kur doli data 3 mars palët janë tërhequr në llogoret e tyre në pritje të vendimit. Pati një ulje armësh nga të dyja palët e deputetëve. Ne ishim përjashtim në përqafim po e mira ishte që të përqafoheshim të gjithë. Shumë deputetë kishin marë përsipër që të hiqnin mburojat dhe shkonim të bashkuar për zgjedhjet e 14 majit”, zbuloi Korreshi.
Më tej ai nënvizoi se para daljes së datës ka pasur një proces i cili ka zgjatur rreth 3 javë në Parlament ku palët e pranonin në mënyrë të heshtur që duhej të bashkoheshin për hir të daljes me kandidat të përbashkët në 14 Maj.
“Ishte një proces që zgjati 3 javë në Parlament me njëri tjetrin dhe dukej se palët e pranonin në mënyrë të heshtur që duhej patjetër të arrihej një konsensus për zgjedhjet e 14 majit. Zoti Alibeaj nuk është pengesë më tepër se sa për të ndryshuar mendjen e tij. Nuk është përfshirë fare në këto debatet brenda përderisa grupi parlamentar vendosi të vinte zotin Bardhi i cili ka qënë negociator”, tha ai.
Përsa i përket Enkelejd Alibeajt, Korreshi u shpreh se nuk është përfshirë fare në këto debate.
“Zoti Alibeaj kundrejt dëshirës dhe vullnetit të disa deputetëve mendoj se do prevalonte dëshira dhe vullneti i 20 deputetëve. Ka dy javë duke pasur parasysh ato që po ndodhin në Parlament për efekt të McGonigal por edhe për efekt të daljes së datës, çdo gjë është zhbërë në mënyrë të frikshme. Kisha shumë optimizëm te kjo pjesë por është zhbërë”, deklaroi deputeti i PD.
