Detaje të reja kanë zbuluar mediat greke nga vrasja aksidentale e shqiptarit në një kafene në “Nea Joni”, teksa kishte dalë për të parë një ndeshje futbolli.
Sipas tyre një bandë me 7 shqiptarë e përfshirë në trafikun e drogës kanë qenë ata që kanë shkaktuar ngjarjen e rëndë në Athinë.
Ata u përleshën në një kafene dhe njëri prej tyre hapi zjarr duke lënë të vdekur klientin e lokalit, po një bashkëkombës i tyre, rreth 30-35 vjeç.
Sipas Newsit.gr banda me 7 anëtarë është e përfshirë në trafikun e drogës.
Hetuesit që po trajtojnë rastin i kanë kushtuar vëmendje të veçantë makinës tip “Cadillac” të gjetur në afërsi të kafenesë së rrugës Kastamonis dhe që dyshohet se i përkiste njërit prej shtatë shqiptarëve.
“Fusha e veprimit” të bandës është qendra e Athinës, pikërisht Sheshi Karaiskaki dhe Agios Pavlos, ku trafikojnë drogë dhe “shesin” mbrojtjen fizike për dyqanet që goditen nga gjobëvënësit.
Banda lëviz edhe me dy makina të tjera, një “Mercedes” ngjyrë gri me targa greke dhe një xhip të zi me targa shqiptare.
Megjithatë, për momentin, shtatë shqiptarët nuk janë identifikuar, ndërsa identiteti i viktimës, po ashtu me origjinë shqiptare, i moshës rreth 30-35 vjeç, i cili mbeti i plagosur rëndë në klavikul dhe ndërroi jetë në spital, është ende mister.
Rastin e ka marrë nën hetim Departamenti i Vrasjeve, ku policia ka grumbulluar nga vendngjarja shtatë gëzhoja dhe një plumb të deformuar nga një pistoletë 9 kalibërshe, ndërsa është vënë në kërkim të personit që ka qëlluar përmes kamerave të sigurisë së dyqanit.
