Presidenti amerikan Joe Biden po priste momentin e duhur për t’iu përgjigjur thirrjes së homologut të tij ukrainas Volodymyr Zelensky për të vizituar vendin e tij të shkatërruar nga lufta, i cili është goditur nga regjimi i Putinit që prej 24 shkurtit 2022.
Volodymyr Zelensky i kishte kërkuar prej shumë muajsh Joe Biden të vizitonte Kievin, por sot presidenti amerikan ka shkelur në kryeqytetin ukrainas, në një vizitë të mbajtur deri në momentin e fundit si sekret.
“Kievi ka marrë një pjesë të zemrës sime”, tha ndër të tjera presidenti amerikan nga kryeqyteti ukrainas.
Udhëtimi sekret
Sipas NYT Biden mbërriti në Ukrainë me tren nëpërmjet Polonisë, në një udhëtim sekret që ndodhi këtë mëngjes (tetë me orën lokale), që përfshinte megjithatë një përgatitje të madhe përsa i përket sigurisë.
CNN raporton se avioni presidencial “Air Force One” u nis nga baza ajrore Andreës me gazetarët në bord duke lënë pajisjet e tyre elektronike në shtëpi.
Shtëpia e Bardhë ka dhënë udhëzime të qarta se çfarë mund të mbajnë në bagazhin e tyre.
Itinerari i përbashkët i presidentit amerikan mund të ketë treguar se ai do të vizitonte Poloninë, por ai (megjithë nxitjet fillestare për t’u takuar me Zelensky në qytetin e Lviv, pranë kufirit polako-ukrainas për arsye sigurie) përfundimisht u nis për në kryeqytetin e Ukrainës pas një udhëtimi të gjatë me tren nga kufiri me Poloninë.
Më pas ai eci nëpër kryeqytetin ukrainas me presidentin ukrainas Volodymyr Zelensky, duke vizituar Manastirin e Shën Michael, ndërsa paralajmërimet për sulm ajror u dëgjuan në të gjithë qytetin. The Times e përshkroi vizitën e Biden në Kiev si “një demonstrim të vendosmërisë së administratës së tij përballë pushtimit rus të vendit”.
Personat që shoqëruan Biden
Biden u shoqërua nga një grup i vogël zyrtarësh të besuar nga Zyra Ovale. Pranë tij ishin këshilltari i sigurisë kombëtare Jack Sullivan, zëvendës shefi i stafit të Shtëpisë së Bardhë Jen O’Malley Dillon, i cili drejtoi fushatën e Bidenit në 2020 dhe asistentja e tij personale Annie Tomasini.
Si zëvendëspresident i SHBA-së, Joe Biden e kishte vizituar Ukrainën gjashtë herë. Vizita e tij e fundit në Kiev ishte në janar 2017, disa ditë para se të largohej nga detyra.
Vlen të theksohet se as ish-zëvendëspresidenti republikan i SHBA-së, Mike Pence , as ish-presidenti, Donald Trump , nuk e kishin vizituar ndonjëherë Ukrainën.
“Putini besonte se Ukraina ishte e dobët dhe Perëndimi ishte i ndarë”, argumentoi Biden, ndër të tjera, ndërsa qëndronte pranë homologut të tij ukrainas. “Ai mendoi se mund të na mundte. Unë nuk mendoj se ai po mendon për këtë tani. Ai bëri një gabim të thjeshtë. Një vit më vonë, ne qëndrojmë këtu së bashku“, tha Biden.
