Profesioni i shoferit është mëse i zakonshëm për meshkujt, por duket se duke drejtuar autobusin e linjës Shqipëri-Itali është gjendur më së miri edhe Eranda, një 33-vjeçare nga Novosela e Vlorës.
Eranda ka rrëfyer eksperiencën e saj jo të zakonshme për “Real People”, duke zbulua se makinën e ka mësuar që në moshën 9-vjeçare me ZIS-in e babait të saj dhe se që e vogël ka qenë “djali i babait” për shkak se i ati kishte 4 vajza dhe asnjë çun në familje.
“Jetojë në Novesolë të Vlorës me punë jam në Fier. Babain e kam pasur shofer dhe që e vogël ngaqë nuk ka patur djalë, ai ma ka mësuar makinën që 9-vjeçe me ZIS. Ishte shumë e vështirë se timoni ishte i madh dhe leva e marshit shumë e fortë. Babi ka qenë shofer për transport mallrash. Punoi me kamion dhe më pas doli në pension. Unë kam dhe tre motra, djalë nuk pati babai. Ishte pasioni dhe këmbngulja ime për këtë profesion. Studiova për mësuesi, mbarova dhe masterin dhe fillova punë në një agjensi turistike, ku punova 7 vite. Pastaj hapi ky kolegu që e kam pronar agjensinë dhe më tha hajde këtu se t’i e di si punë. Unë kam dy vjet që punoj në Fier, kurse si shofere kam një muaj e pak që kam marrë dhe patentën. Vështirësi për mua nuk kishte patenta se kam dhe patentën e kamionit”, tha Eranda.
Duke treguar detaje nga jeta e përditshme në punës, Eranda tha se doganierët më të mirë janë shqiptarët dhe italianët, ndërsa shtoi se doganierët në Serbi e thërrasin “Madame”.
“Doganierët më të mirë janë shqiptarët, pastaj vijnë ata të Italisë, në Brindizi. Dhe ata janë shumë të mirë, janë sjellë shumë mirë me ne deri më sot. Më të vështirët? Ka qenë hungarezi, por edhe me Hungarinë e kam pasur shumë mirë. Kam pasur momente shumë të mira andej, gjithmonë. Sidomos në Serbi më thoshin madam. Doganierët serbë, sa më shihnin, thonin madam”, theksoi ajo.
Ajo gjithashtu tha se gjëja që i pëlqen më shumë në profesionin e saj janë darkat me kolektivin e punës. Sipas saj shoferët kanë shumë humor, por nuk mund t’i tregojë të gjitha në ekran.
“Dreka kur hamë kolektivi është e veçantë. Nuk tregohen të gjitha. Unë flas më shumë se ata. E lëshojnë një çik gojën shoferat. Unë u kam thënë vazhdoni mos e çani kokën sikur jemi vëlla dhe motër. Në fillim ndiheshin mirë, pastaj filluan dhe këta konkurentët tanë që ia bënin hajde Eranda, hajde ‘bisha’ hajde me ne. Kur më shihte pronari më thoshte çdo që rri me ata. Më kanë bërë oferta pafund”, tha Eranda.
