Policia e Tiranës ka arritur të zbardhë aksidentin e rëndë që ndodhi mbrëmjen e djeshme në zonën e Freskut, ku humbi jetën 20-vjeçari Enjon Saliaj, djali i Kudret Saliaj, i cili u vra nga gruaja dhe vjehrri i tij gjatë kohës që ishte në proces divorci me të shoqen.
Sipas njoftimit të policisë, 20-vjeçari ka qenë duke lëvizur me një motor elektrik, në momentin kur është përplasur nga makina mbrëmjen e të enjtes.
Ngjarja ka ndodhur rreth orës 23:00 dhe me dije bëhet se shoferi është larguar menjëherë pasi ka përplasur të riun, duke e braktisur dhe automjetin.
Teksa në informacionin paraprak mbi ngjarjen, uniformat blu shpreheshin se mjeti drejtohej nga shtetasi me iniciale F.A., në njoftimin e dytë ku sqarohet plotësisht ngjarja bëhet me dije se shofer në momentin e aksidentit ka qenë një 19-vjeçar.
Ai është identifikuar si shtetasi Sildi Krashi, i cili është vënë në pranga nga forcat e rendit.
Njoftimi i policisë:
Në vijim të punës për zbardhjen e rrethanave të aksidentit të ndodhur rreth orës 23:30 të mbrëmjes së djeshme, te Fresku, ku si pasojë e përplasjes së një automjeti me një motor elektrik, mbeti i dëmtuar shtetasi E. S., 20 vjeç (drejtuesi i motorit elektrik), i cili më pas humbi jetën në spital, specialistët e Komisariatit Rajonal të Policisë Rrugore Tiranë kanë kryer veprime hetimore për vënien përpara përgjegjësisë ligjore të drejtuesit të automjetit të përfshirë në këtë aksident.
Nga veprimet hetimore ka rezultuar se në kohën që ka ndodhur aksidenti, automjeti nuk drejtohej nga pronari i tij, shtetasi F. A., por drejtohej nga shtetasi S. K., 19 vjeç, banues në Tiranë.
Nga verifikimet ka rezultuar se shtetasi S. K. ishte i pajisur me lejen përkatëse të drejtimit dhe nuk ka qenë nën efektin e alkoolit në kohën që është përfshirë në aksident.
Automjeti dhe motori elektrik u sekuestruan në cilësinë e provës materiale.
Në përfundim të veprimeve, shtetasi S. K., 19 vjeç, banues në Tiranë, u arrestua në flagrancë dhe materialet i kaluan Prokurorisë, për veprime të mëtejshme”, thuhet në njoftimin e policisë.
LEXO EDHE:
Detaje nga aksidenti në Tiranë/ Viktimës ia vrau babanë gjyshi, e ëma në burg
