Deputetja e Partisë së Lirisë Monika Kryemadhi ka reaguar për mediat pas daljes së saj nga Prokuroria e Posaçme këtë të martë.
Për më shumë se dy orë është marrë në pyetje në ambientet e SPAK, deputetja e Partisë së Lirisë, Monika Kryemadhi.
Ajo foli për mediat pasi la ambientet e Prokurorisë së Posaçme duke sqaruar se kishte shkuar për të dorëzuar provat e reja për inceneratorin e Tiranës si dha ka përsëritur kallëzimin e bërë prej saj më 4 mars 2022.
Kryemadhi gjitjhashtu kërkoi që të ndërpriten pagesat për konçesionarin e inceneratorit nga Bashkia e Tiranës.
“Sot isha pranë SPAK për çështjen e inceneratorit të Tiranës. Kam dorëzuar padi në 4 mars të 2021. Gjerat tani po zbardhen, shpresoj që më e pakta është që të ndalet pagesa për inceneratorin. Edhe pse është thënë për marrjen e bonusin 8 pikësh për këtë kompani, në rastin kur nuk kemi pagesa buxhetore, s’kemi pse bëjmë pagesën 29 euro për ton. Shtova dhe do vazhdoj të dorëzoj dokumentet e tjera për rihapjen e vend depozitimit të ri në Sharrë”, tha deputetja e PL.
Kryemadhi u pyet nga gazetarët se në çfarë faze janë hetimet dhe u përgjigj duke thënë se inceneratori i Tiranës është një skenë krimi dhe për këtë arsye do të publikojë video të tjera, nga droni i së vërtetës.
“Në Komisionin Hetimor Rama dhe Veliaj kanë gënjyer. Në rastin tim unë kam kërkuar diferencimin që nuk ndodh por ka vetëm groposje. Në korrik të vitit 2022 gropa që duhet të ishte mbushur për 30 vite është mbushur për 9 muaj. Droni i së vërtetës tashmë i ka vendosur në lëvizjes. E di që është e vështirë për ndërhyrje e mëdha që bëhen nga qeveria, por me besim të plotë them që gjërat do të realizohen. Besoj që drejtësia do të triumfojë për qytetarët shqiptarë, pasi kemi një kompani inekzistente”, tha Kryemadhi.
