Deputetja e Partisë Demokratike, Albana Vokshi, ka denoncuar Drejtorinë Rajonale të Arsimit Durrës. Vokshi shprehet se ka shkelur ligjin duke shpërndarë aktivitet politike të Partisë Socialiste.
Vokshi i ka bërë thirrje KQZ që të marrë menjëherë masa për Ministren Kushi dhe drejtuesit e Drejtorive arsimore.
“Shkelje flagrante e ligjit. Drejtoria Rajonale e Arsimit Durrës shpërndan aktivitet politike të Partisë Socialiste. @eviskushi të shkarkohet! Drejtuesit e #DRAP që postojnë aktivitete politike të shkarkohen menjëherë. @kqzshqiperi të marrë menjëherë masa për Ministren Kushi dhe drejtuesit e Drejtorive arsimore. #Politizimi i arsimit, #shantazhimi prej #patronazhistëve të Partisë shtet, kërcënimi me vendin e punës, janë arësyet pse sot #arsimi është në gjendjen me të keqe në të gjithë historinë e vet”, shkruan ndër të tjerash Vokshi.
Vokshi shkruan se fëmijët meritojnë një sistem arsimor cilësor e të barabartë dhe se drejtorët e shkollave, mësuesit të refuzojnë shpëndarjen e propagandës së Partisë Socialiste.
“Fëmijët e të rinjtë meritojnë një sistem arsimor cilësor e të barabartë! Drejtorët e shkollave, mësuesit të refuzojnë shpëndarjen e propagandës së Partisë Socialiste!! Të protestojnë për trajtimin me respekt e dinjitet, sic atyre ju takon!”, përfundon deputetja demokrate.
Disa ditë më parë, Vokshi, ka denoncuar ministren e Arsimit Evis Kushi, se kjo e fundit detyron Drejtorët e shkollave t’i bëjnë “likes” and “shares” çdo aktiviteti të saj.
Përmes një postimi në rrjetin e saj social fb, Vokshi ka publikuar mesazhin e një drejtuesi shkolle, i cili shprehet se në çdo link të dërguar nga ZVA, për raportimet javore të mësimdhënies, është e detyrueshme që të japësh “like” dhe “share” në postimet e ministres së Arsimit, Evis Kushi.
“Pavarësisht se shkollat kanë dhjetëra probleme të pranishme, propaganda e Rilindjes intensifikohet para zgjedhjeve duke patronazhuar Drejtorët e mësuesit”,- shkruan Vokshi mes të tjerash në fb.
