Krimi në familjet shqiptare që jetojnë emigrim ka tronditur sërish një vend europian. Këtë herë në Gjermani një 47-vjeçar shqiptar raportohet se ka masakruar për vdekje ish-bashkëshorten e tij.
Ngjarja e rëndë ka ndodhur një ditë më parë në Markdorf. Mësohet se shqiptari e ka vizituar ish-gruan në vendin e saj të punës dhe e ka qëlluar për vdekje, duke tentuar më pas arratisjen nga vendngjarja.
Autoritetet kanë ndërhyrë në kohë duke e vënë në pranga 47-vjeçarin menjëherë pas ngjarjes dhe ai aktualisht ndodhet në paraburgim.
Kjo është bërë e ditur nga prokuroria publike në Konstanz dhe selia e policisë në Ravensburg në një deklaratë të përbashkët.
Autoritetet gjermane kanë ngritur një grup hetimor për zbardhjen e krimit, ndërsa kanë përfunduar hetimet mjeko-ligjore në vendin e ngjarjes.
Policia dyshon se dëshmitarët e kanë parë krimin, por janë larguar nga vendi i ngjarjes para se të mbërrinte policia dhe bën apel se kushdo që ka parë diçka duhet të denoncojë.
Sipas raporteve, burri mësohet se ka qëlluar 44-vjeçaren në gjendje të dehur dhe ajo ka ndërruar jetë në vend.
