Fieri është tronditur mesditën e sotme nga të shtëna me armë që u shënuan ditën për diell në rreth rrotullimin pranë një qendre tregtare në lagjen “11 janari”.
Nga të shtënat me armë ka mbetur i plagosur një 50-vjeçar, i cili sipas dëshmitarëve okularë që kanë folur për TV Klan ka qenë në shoqërinë e vajzës së tij të mitur rreth (7-8 vjeç).
Në drejtim të tij është qëlluar të paktën 3 herë me pistoletë dhe një prej plumbave e ka kapur në pjesën e barkut, por fatmirësisht nuk i ka prekur organet jetësore. Policia e ka identifikuar personin e plagosur si shtetasi Dashmir Muça, ndërsa autori i ngjarjes është 52-vjeçari Altin Nika.
Autori mësohet se udhëtonte me një makinë tip “Toyota”, ndërsa ngjarja dyshohet se ka ndodhur për konflikte të çastit.
Aktualisht e gjithë zona është rrethuar nga forcat e policisë, ndërsa Muça është dërguar në spital dhe ndodhet jashtë rrezikut për jetën.
Sakaq, policia bën me dije se pas identifikimit po punon për kapjen e autorit 52-vjeçar.
Njoftimi i policisë:
Plagosi me armë zjarri një shtetas, pas një konflikti të çastit, identifikohet dhe shpallet në kërkim autori i dyshuar.
Shërbimet e Policisë kanë ngritur pika të shumta kontrolli, në të gjithë territorin e qarkut, me qëllim kapjen e tij.
Rreth orës 13:15, në lagjen “11 janari”, dyshohet se pas një konflikti të çastit, shtetasi Altin Nika, 52 vjeç, ka plagosur me armë zjarri, shtetasin Dashamir Muça, 50 vjeç, i cili ndodhet në spital, nën kujdesin e mjekëve.
Vijon puna intensive për kapjen e shtetasit Altin Nika.
Grupi hetimor ndodhet në vendngjarje dhe po punon për zbardhjen e plotë të kësaj ngjarjeje.
