Luçiano Boçi, kandidati i opozitës për kreun e Bashkisë Elbasan, ka vënë sërish theksin sot tek mostrajtimi i mbeturinave në këtë qytet, i cili mbetet prej shumë vitesh në problem pa zgjidhje.
Boçi shprehet se çështja e menaxhimit të mbetjeve është rënduar akoma më shumë nga korrupsioni prej miliona eurosh me inceneratorët dhe akuzoi pushtetin vendor të drejtuar nga socialisti Gledian Llatja e kritikoi organet e drejtësisë.
“Bashki e zhytur në korrupsion! – shkroi Boçi në Fb. – Flamujt e kuq, si sinjalizuese korrupsioni, shoqërojnë tenderat dhe prokurimet e bashkisë Elbasan! Një institucion i mbyllur, pa transparencë, jashtë çdo llogaridhënieje që kënaq në mënyrë të pandërprerë klientelën e tij!
Ja se si në një rast të vetëm jepen 100 milionë lekë pa garë dhe në mungesë konkurence për blerjen e mjeteve teknologjike për pastrim! Abuzim që duhet të vendosë në veprim drejtësinë. Sikur të mos mjaftonte vjedhja dhe abuzimi me tenderat, gjendja e menaxhimit të mbetjeve në Elbasan është e tmerrshme!”
