Dy ditë pas arrestimit të djalit të mbretit të drogës “El Chapo” dhe “luftës” që shpërtheu midis kartelit të Sinaloas dhe ushtrisë e forcave speciale në Meksikë, mediat vendase kanë publikuar pamjet nga momenti i shoqërimit të 32-vjeçarit.
Operacioni për vënien në pranga të Ovidio Guzman u realizua nga forcat e sigurisë meksikane të mërkurën mbrëma, gjë që shkaktoi një valë të madhe dhune dhe vrasjesh në të gjithë shtetin e Sinaloas, duke përfshirë aeroportin e Culiacan ku shokët e Ovidios goditën me plumba tre avionë, duke shkaktuar panik mes pasagjerëve dhe stafit.
Nëntëmbëdhjetë anëtarë të dyshuar të kartelit dhe dhjetë anëtarë të forcave të sigurisë u vranë gjatë përleshjeve, ndërsa 21 persona të tjerë u arrestuan gjatë operacioneve.
Sakaq, Ovidio njihet edhe me nofkën “El Ratón” ose “Miu”. Ai aktualisht po mbahet në një burg federal të sigurisë maksimale në Mexico City dhe video e shpërndarë tregon momentin kur e hipin në helikopterin e posaçëm për të kryer transportimin e tij drejt kryeqytetit.
I veshur me një jelek portokalli me ngjyrë burgu, ai shikon me sy të trembur, ndërsa po merret në pyetje nga oficerët. Një foto e dytë e tregon atë duke u futur në një helikopter.
