Të paktën 5 persona kanë humbur jetën dhe 37 janë plagosur në një zjarr masiv të shkaktuar nga përplasja e një kamioni mallrash me një autobus në një tunel autostrade pranë kryeqytetit të Koresë së Jugut, Seul.
Nuk dihet se çfarë e shkaktoi përplasjen dhe zjarrin apo se çfarë ngarkese mbante kamioni. Zjarri shpërtheu rreth orës 13:50 me kohën lokale në një tunel të autostradës në Gwacheon. Tuneli i ngritur është projektuar për të mbrojtur ndërtesat përreth nga zhurmat e rrugës.
3 nga të plagosurit janë në gjendje të rëndë. 34 të tjerë kanë pësuar lëndime të lehta. Shtëllunga të mëdha zjarri dhe tymi i dendur u panë që dilnin nga tuneli në imazhet e postuara në mediat lokale dhe rrjetet sociale.
Qindra zjarrfikës arritën të vënë nën kontroll flakët. “Ne po bëjmë kërkime brenda tunelit në rast se ka viktima të tjera” – tha një zyrtar i zjarrfikësve. Rreth 20 persona po trajtohen në spital pasi kanë marrë tym në mushkëri.
Ministri i Brendshëm Lee Sang-min bëri thirrje për “përdorimin e burimeve maksimale” për të shpëtuar jetë. “U bëj thirrje autoriteteve të bëjnë përpjekjet më të mëdha për të shpëtuar jetën e atyre që janë plagosur” – tha ai.
Në tetor, të paktën 153 njerëz u vranë në një përplasje mes turmës së Halloween në lagjen Itaewon të Seulit. Një seri fatkeqësish të parandalueshme ka tronditur besimin e publikut. Shumë koreano-jugorë kanë vënë në dyshim nëse standardet e sigurisë janë anashkaluar dhe rregulloret janë injoruar në nxitimin e qeverisë për zhvillim ekonomik.
