Në portin e Ankonës në Itali, Guardia di Finanza ka bllokuar dy automjete luksoze tip “Range Rover”, të cilat ishin nisur me destinacion Shqipërinë.
Sipas mediave vendase makinat po transportoheshin me një kamion, por autoriteteve portuale u kanë lindur dyshime dhe kanë vendosur të kontrollojnë për të zbuluar se kujt i përkisnin dy “Range Rover” luksozë.
Gjatë kontrollit është kërkuar që të kalohet në “sitë” edhe dokumentacionin e tyre, ku agjentët kanë konstatuar parregullsi.
Kontrollet më të thelluara kanë nxjerrë në dritë shenja të qarta të ndryshimit të numrit të shasisë së dy mjeteve.
Pas identifikimit të numrave realë të shasisë, u bë e mundur të gjurmohej identifikimi i saktë i makinave, zhdukja e të cilave ishte raportuar.
Pronarët aktualë, të cilët po tentonin t’i transferonin në Shqipëri, u denoncuan për pastrim parash dhe posedim dokumentacioni fals, ndërsa dy makinat u sekuestruan.
