Një viktimë dhe dy të plagosur ishte bilanci tragjik i një aksidenti të ndodhur në orët e para të mëngjesit të 24 dhjetorit në rrugën dytësore Plepa-Golem.
Viktima është 50-vjeçari Bardhyl Beqiri, punonjës i pastrimit dhe gjelbërimit, i cili është goditur për vdekje nga një automjet luksoz tip “Mercedes Benz”, që drejtohej nga 18-vjeçari i identifikuar si Braian Hoxha.
Në aksident u plagosën edhe dy vajza 20-vjeçare, të cilat ishin pasagjere në makinën që drejtohej nga i riu.
Boldnews.al ka arritur të sigurojë videon ekskluzive të aksidentit që ndodhi në vendin e quajtur “Shkëmbi i Kavajës”, në Durrës.
Mësohet se makina që drejtonte 18-vjeçari, Braian Hoxha ishte tip “Benz S Class”. 18-vjeçari ka humbur kontrollin e automjetit për shkak të shpejtësisë së lartë dhe për pasojë ka marrë përpara duke i shkaktuar vdekjen e menjëhershme 50-vjeçarit.
Personi i aksidentuar për vdekje në videon ekskluzive shihet që po zbret nga makina e pastrimit për të shkuar tek hoteli ku edhe ishte i punësuar si kopshtar.
Pikërisht me ambientet e jashtme të këtij hoteli ka përfunduar i përplasur automjeti luksoz i të riut.
Ndërkohë, në njoftimin e policies për ngjarjen thuhet: “Në orët e para të mëngjesit, në vëndin e quajtur “Shkëmbi i Kavajës”, shtetasi B. H., 18 vjeç, ka humbur kontrollin mbi drejtimin e automjetit, dhe për pasojë automjeti është përplasur me ambientet e jashtme të një hoteli. Si pasojë e përplasjes, ka humbur jetën shtetasi B. B., rreth 50 vjeç (punonjës pastrimi dhe gjelbërimi), i cili në momentin e përplasjes, ishte duke pastruar. Gjithashtu, nga përplasja janë dëmtuar shtetaset F. D., 20 vjeçe dhe L. P., 20 vjeçe, pasagjere në këtë automjet, të cilat ndodhen nën kujdesin e mjekëve. Drejtuesi i automjetit, shtetasi B. H. është shoqëruar në Komisariatin e Policisë, për veprime të mëtejshme”.
Por, pavarësisht njoftimit të policisë dhe ndalimin e 18-vjeçarit, ajo çka ngre dyshime të forta mbi këtë ngjarje të rëndë është fakti që automjeti është hequr me nxitim nga vendngjarja dhe nuk ka asnjë arsye që e mbështet këtë veprim.
