Ekzekutimi i dy shqiptarëve Kreshnik Çerçizaj (42 vjeç) dhe Armando Ogranja (44 vjeç) në një lokal në Nea Smyrni të Athinës, për policinë greke duket se ka ndodhur pas përfshirjes në historinë e zhdukjes së një ngarkese prej 700 kg kanabis.
Autoritetet greke kanë lidhur vrasjen e dyfishtë edhe me ekzekutimin në Tiranë mbrëmjen e së premtes së 49-vjeçarit Edmond Papa, por edhe atentatin me bombë ndaj Aleksandër Sadikaj disa muaj më parë pranë rrethrrotullimit të “TEG-ut”.
Duket se në botën shqiptare të krimit është krijuar një spirale vrasjesh për ngarkesën e humbur dhe sipas informacioneve të televizionit grek MEGA, pas atentatit në Nea Smyrni është zhdukur një tjetër person me origjinë shqiptare.
Personi i quajtur Leonardo duket se ka pasur marrëdhënie të ngushta me dy viktimat në Athinë dhe ekziston një shqetësim i fortë nga ana e policisë greke se cikli i gjakut ende nuk është mbyllur dhe ka frikë për një krim tjetër.
MEGA gjithashtu sqaron se policia greke po e kërkon autorin e ngjarjes në Nea Smyrni në kartelet e ashpra të trafikantëve shqiptarë të drogës.
