Vetëm pak orë pas finales së Botërorit, ku Argjentina fitoi me Francën, rrugët e Dohas janë të shkretuara. Gjallëria dhe entuziazmi i tifozëve dhe turistëve gjatë 28 ditëve të turneut, i ka lënë vendin zbrazëtisë.
Përfaqësueset pjesëmarrëse janë larguar nga Katari, e së bashku me to edhe tifozët. Doha po i kthehet normalitetit, me dekorimet e turneut që po hiqen, ashtu si edhe gardhet e përkohshme rrethuese, që shërbenin për vendgrumbullimet e tifozëve.
Në zonën e Corniche, një shëtitore piktoreske që shërbeu si sfond për foto kujtimet e tifozëve, punëtorët çmontuan instalimet dhe zbukurimet e Kupës së Botës dhe fshinë pluhurin. Varkat prej druri që ndodheshin aty, kanë ngritur spirancën dhe u larguan.
“Është çmenduri. Pas gjithë asaj feste, tani ky duket si një qytet fantazëm. Nga festa në shkretëtirë, gjithçka në harkun e vetëm pak orëve”, thotë një tifoz i Argjentinës.
“Nuk ka problem. Dita e finales ishte fantastike. Festuam deri në mëngjes, pamë lindjen e diellit me bashkëkombasit tanë. Ia kaluam vërtetë bukur”, shprehet një tjetër tifozë argjentinase. Edhe zonat e populluara me restorante apo tregu tashmë janë bosh. Aty kanë mbetur vetëm pak turistë.
“Ishte befasi. Kur u zgjova në mëngjes, mendoja se do të kishte ende shumë njerëz. Por është vërtetë qetësi”, thotë kamarieri i një restoranti.
Pas organizimit të Kupës së Botës, Katar 2022, tashmë vendi i vogël i Gjirit Persik po i kthehet normalitetit.
