Qytetarët në Shkup kanë qenë në alarm paraditen e sotme, pasi rreth orës 09:30 në SPB Shkup është raportuar se në adresën elektronike të shtatë shkollave të mesme është dërguar kërcënim me eksploziv.
Kërcënimet me bombë janë marrë për shkollat e mesme Vllado Tasevski, Korçagin, Josip Broz Tito, Orce Nikollov, Nikolla Karev dhe Mihajllo Pupin.
Menjëherë pas marrjes së denoncimit, nga punonjësit e policisë janë marrë masat për evakuimin e sigurt të shkollave dhe po vijojnë kontrollet antiterroriste dhe po merren masa për zbardhjen e rasteve.
Gjithashtu raportohet se në adresë elektronike është dërguar kërcënim për bombë të vendosur në qendrat tregtare “East Gate”, “Biser”, “Transport Center”, “Flatron” dhe “Qendër”.
Denoncime për bomba janë marrë edhe për në Stacionin Hekurudhor në Shkup. Policia ka bllokuar hyrjen , ndërsa është mbyllur edhe nënkalimi nga qendra drejt Aerodromit.
Nga Ministria e Brendshme në Maqedoninë e Veriut thonë se menjëherë janë marrë masat e nevojshme për evakuimin e sigurt të objekteve dhe po kryhen kontrolle nga strukturat e Antiterrorit në kuadër të masave që janë marrë për zbardhjen e rastit.
