Paulo Bento, ka njoftuar dorëheqjen e tij nga posti i trajnerit të Koresë së Jugut. Tekniku portugez heq dorë nga posti drejtues pas eliminimit ndaj Brazilit në Kupën e Botës.
Tekniku, i cili ishte në këtë rol që nga viti 2018, tha se vendimin e tij ua ka komunikuar lojtarëve dhe Federatës.
“Jam i lumtur me këto katër vite punë. Dua t’i falënderoj për besimin e tyre”, tha Bento pas humbjes 4-1 nga Brazili në 1/16 të Kupës së Botës.
“Për momentin, nuk është e lehtë të përmbledh gjithçka që ka ndodhur në Kupën e Botës, veçanërisht sepse nuk ka përfunduar, mund t’ju tregoj vetëm për udhëtimin tonë, i cili tashmë ka marrë fund. Ka përfunduar në mënyrë shumë të drejtë, ne duhet të përgëzojmë Brazilin sepse ata ishin më mirë”.
“Ne mund të jemi krenarë për mënyrën se si e përfunduam lojën, ashtu siç mund të jemi me katër vitet që na sollën këtu. Ajo që bëmë në fazën e grupeve ishte shumë e mirë, për mënyrën se si luajtëm, sepse arritëm deri në fund. 16 për herë të tretë në histori”, shtoi Bento, i cili, ashtu siç bëri në konferencën për shtyp para ndeshjes, kritikoi mungesën e kohës së përgatitjes për ndeshjen – vetëm 72 orë. “Nuk arritëm të përgatiteshim siç donim dhe ishte shumë e vështirë”, tha ai.
