Të tjera të dhëna të shqiptarëve ekspozohen në rrjetet sociale. Këtë të Hënë, grupi “Homeland Justice” publikoi një material voluminoz në “Telegram” me të dhëna të patentave të shqiptarëve dhe informacione të tjera që përmban dokumenti.
Në dokument shfaqen ndër të tjera emrat, mbiemrat, vitet e lindjes, adresat si dhe targat e automjeteve të shqiptarëve.
Disa ditë më parë, hakerat publikuan të dhënat e Drejtorit të Përgjithshëm të Policisë së Shtetit, Muhamet Rrumbullaku. Po ashtu “Homland justice”, publikoi dhe të dhënat të nëndrejtorit të ri të SHISH, Oljan Kanushi.
Që prej vitit 2021, Shqipëria ka rënë pre e sulmeve kibernetike. Një sulm kibernetik u shënua më 15 korrik të këtij viti, që bllokoi të gjitha faqet zyrtare shtetërore dhe platformën e shërbimeve online e-Albania. Ndërkohë, më 14 shtator u sulmua sistemi TIMS në të gjitha pikat kufitare të vendit. Për këto sulme Shqipëria ka fajësuar Iranin dhe ka ndërprerë marrëdhëniet diplomatike me këtë shtet.
Grupi “Homeland Justice” ka marrë përsipër autorësinë e dy sulmeve kibernetike.
Ndër publikimet nga “Homeland Justice” që shkaktuan më shumë debat ishte një listë me fluturimet e kreut të qeverisë Edi Rama. Opozita e akuzoi kryeministrin për shpërdorim të parave publike dhe kërkoi ngritjen e një komisioni hetimor.
Hakerat kanë publikuar një sërë informacionesh të tjera. Mes tyre edhe disa dokumente të klasifikuara “sekret” që dyshohet se u hakërruan nga posta elektronike e ish-kreut të Policisë së Shtetit Gledis Nano. Publikimi erdhi pak pasi Rama do të deklaronte publikisht se hakerat nuk kanë arritur të marrin të dhëna sekrete.
Po ashtu, janë publikuar edhe e-mail-et e kreut të SHISH Helidon Bendo, të dhëna personale të tij dhe të bashkëshortes, emrat e punonjësve të SHISH dhe pamje që besohet se janë të aksioneve të Shërbimit Sekret.
