Superjahti “Perla e zezë”, një nga jahtet më të mëdha dhe më të bukura në botë, ka mbërritur në portin e Durrësit për të përfituar nga lehtësitë që ofron vendi ynë për furnizimin me karburant dhe hyrjen në kufi për shtetasit e huaj.
“Perla e zezë” do të qëndrojë deri në mbrëmje në portin më të madh të vendit dhe pasi të ketë kryer shërbimet për të cilat ka mbërritur, furnizimin me naftë në çmimin e bursës dhe ndërrimin e ekuipazhit, do të largohet për të vijuar lundrimin e saj.
I ndërtuar në vitin 2018, superjahti me vela dhe 106.7 metra i gjatë ka qenë në pronësi të miliarderit rus Oleg Burlakov, i cili vdiq nga Covid 19 në qershor të vitit 2021. Pas vdekjes, bashkëshortja e tij e shiti jahtin, i cili aktualisht zotërohet nga një kompani jahtesh turistike qipriote, që i jep me qira ato.
Black Pearl është ndërtuar nga Oceanco dhe iu dorëzua pronarit të saj në 2018. Ai është rezultat i një dizajni evolucionar nga Ken Freivokh Design, Nuvolari Lenard dhe “Villate Design”. Pavarësisht strukturës së madhe, disa ekspertë e konsiderojnë këtë të fundit më tepër një jaht motorik me vela sesa një anije me vela.
Që nga fillimi i vitit 2019, “The Black Pearl” ka mbledhur çmime si “Jahti më i mirë lundrues prej 60 metrash e lartë”, në World Superyacht Aëards, si dhe çmimin “Arkitektura më e mirë detare për lundrim për jahtet”.
