Nga foltorja e Kuvendit, deputeti socialist dhe ish-ministri Arben Ahmetaj tha se Porti i ri i Durrësit është një projekt model zhvillimi.
Ahmetaj theksoi se ky do të jetë një port model për vendin tonë dhe se do të hapë 12 mijë vende pune.
“Debati duhet të përqendrohet: Çfarë i sjell vendit? Shumë nga ne s’do jemi në Parlament, ju uroj të gjithëve jetë të gjatë. Por pas aq vitesh nuk dihet nëse do jemi gjallë, por fëmijët tanë do të jenë. Do të jetë një Port model për Shqipërinë. Pse pak janë 12 mijë vende pune që do shkojnë në punë atje? Apo kjo nuk ju hyn në sy juve. A nuk ju pëlqen investitori?! Ky që ndërton për rindërtimin falas në emër të Princit të Kurorës, për qytetarët shqiptarë, qenka i mirë të ndërtojë apartamente e infrastrukturë për rindërtimin, por nuk qenka i mirë të ndërtojë pallate e hotele këtu. Pastaj thoni ky ka aq para e aq para. Ju mundoheni tu hidhni baltë të gjitha investimeve. Ky është në të tre shtyllat e veta, në aspektin legal, ekonomik dhe të transparencës projekt shembull”, tha ai.
