Një aksident i rëndë, i ndodhur në zonën e San Martinos në Itali, i ka marrë jetën një 24-vjeçare shqiptare.
E reja shqiptare, Blerina Kryeziu ishte duke shkuar në punë në momentin që është përplasur nga makina. Prej më shumë se tre vitesh e reja, e martuar prej disa muajsh, punonte në restorantin e njohur “da Silvano”.
Edhe të premten rreth orës 19:00 ishte nisur për atje për të nisur në kohë turnin. Ajo po shkonte në këmbë duke ecur anës së rrugës, në një aks pa ndriçim.
Një “Nissan Juke” e goditi atë, duke e hedhur në dhjetë metra largësi prej forcës së përplasjes.
24-vjeçarja, e cila jetonte në Treviso dhe së shpejti do të shkonte të jetonte në San Biagio, u mbajt në jetë nga mjekët që mbërritën në vendngjarje, të cilët e transferuan në gjendje të rëndë në spitalin Ca’ Foncello.
Por fatkeqësisht pas tri ditësh terapi intensive ajo nuk ka mundur të mbijetojë.
