Një i ri shqiptar, i cili është pronari i dy dyqaneve me të brendshme luksoze në zonën e Kinston Upon Hull është vënë në pranga nga policia britanike, pasi në bizneset e tij është gjetur një sasi e konsiderueshme droge.
Sipas mediave britanike, Oltion Ademi ka përdorur dy dyqanet në “Princes Avenue” si vend për të shitur kokainë dhe kanabis.
38-vjeçari shqiptar zotëronte dyqanin e të brendshmeve ‘Sensh’ dhe dyqanin e suplementeve ‘It’s Organic’. Policia gjatë kontrolleve të kryera në këto biznese ka gjetur gjashtë doza kokainë me peshë 133 gr dhe me vlerë 5,100 paund.
Gjurmët e gishtave të Ademit u gjetën në ambalazhin e jashtëm të lëndës narkotike. Po ashtu u sekuestruan në cilësinë e provës materiale dhe 1 mijë paund, peshore, disa telefona, një makinë numërimi parash dhe çanta vetëvulosëse.
Ndërkohë, brenda një furgoni “Ford Transit” janë gjetur shumë sende të lidhura me kultivimin e kanabisit, ku përfshihen 19 drita, 90 transformatorë, plastmasa të zinj dhe vazo bimësh.
Mes këtyre provave shqiptarit iu gjetën dhe mesazhe telefonike që faktonin veprimtarinë e të lidhura me tregtimin e drogës, në të cilat njerëzit që kujdeseshin për prodhimin e kanabisit i referoheshin atij si “bos”.
Ademi pranoi në gjykatën e Lartë të Hullit se kishte pasur në posedim 14 kg kanabis dhe kokainë me qëllim furnizimi, por prokurorët paraqitën prova se si 38-vjeçari po fitonte shuma të konsiderueshme parash nga trafiku i drogës.
Prokurori Ian Cook zbuloi se Ademi jetonte prej më shumë se 20 vitesh në Britaninë e Madhe.
