Kombëtarja shqiptare e shtangës ka marrë pjesë në një event ndërkombëtar, siç ishte “Open Bosnia Cup”, garë e zhvilluar më datat 11-13 nëntor në Sarajevë.
Paraqitja e kuqezinjve të vegjël të shtangës në këtë eveniment ishte tepër pozitive, teksa Shqipëria arriti që të fitonte 11 medalje: 3 ari, 4 argjendi dhe 3 bronzi, çmimin e sportistes më të mirë si dhe Kupën e turneut. Spikati paraqitja fantastike nga Enkileda Carja në kategorinë e peshave 59 kg.
Ndonëse në një moshë më të vogël se kundërshtaret, Carja shkëlqeu duke fituar medalje ari, teksa regjistroi 75 kg në shkëputje dhe 90 kg në shtytje, rezultatet që e renditën në vend të parë në klasifikimin e pikëve mes të gjitha rivaleve.
Pas përfundimit të “Open Bosnia Cup”, presidenti FSHP-së, Elez Gjoza, në një prononcim për “Panorama Sport” komentoi paraqitjen e Shqipërisë:
“Marrja pjesë në këtë aktivitet është te filozofia që ne kemi për të zëvendësuar shumë shpejt ekipin e parë kombëtar, në mënyrë që mos të krijohet vakum dhe ndarje e madhe ndërmjet brezave.
Ishte një përfaqësim tepër dinjitoz, në të cilin Shqipëria fitoi edhe Kupën e këtij eventi, duke regjistruar plot 11 medalje. Shkëlqeu sportistja 14-vjeçare e Elbasanit, Enkileda Carja, e cila u shpall edhe më e mira e aktivitetit. Rezultatet e kësaj sportisteje radhiten nga vendi i parë deri në vendin e katërt në rang botëror. Pra bëhet fjalë për një peshëngritëse me shumë të ardhme.
Njëkohësisht performanca e të gjithë ekipit ka qenë shumë e mirë, pasi ne i kemi grumbulluar vazhdimisht, duke e stimuluar ekipin e të rinjve.
Madje gjysmën e këtij ekipi pas garës në Bosnjë, ne e kemi dërguar në një tjetër kompeticion në Turqi, ku edhe atje sportistët tanë do të fitojnë medalje. Fkusi i federatës është tek ekipi i të rinjve. Kemi rreth 20 të rinj, të cilët po spikasin dhe do të jenë e ardhmja e këtij sporti në Shqipëri.Vitin tjetër kemi Botërorin U-15 dhe U-17, dhe duke parë formën e këtyre të rinjve, Shqipëria do të jetë ndër vendet e para në Botë duke fituar disa medalje të arta, të argjendta dhe të bronzta.Deri në vitin 2024 Shqipëria do të ketë një Kombëtare të re, plot 20 sportistë të rinj, të cilët do t’i japin vërtet kuptim peshëngritjes që është një sport popullor dhe që ka një të ardhme totalisht të sigurt”, tha ndër të tjera në prononcimin e tij kreu i peshëngritjes shqiptare.
