Java ka nisur me një aksident të rëndë të shënuar mëngjesin e kësaj të hëne në aksin rrugor Fushë Krujë-Milot.
Në afërsi të fshatit Derven një fuoristradë “Benz” me targë AA 363 AM, është përplasur me një furgon mallrash me targë AA 670 RP.
Përplasja mes mjeteve ka lënë të plagosur rëndë tre persona, të cilët janë transportuar drejt spitalit të Traumës në Tiranë.
Fillimisht drejtuesi i furgonit kishte mbetur i bllokuar në automjet pas përplasjes së fuqishme, por forcat zjarrfikëse kanë ndërhyrë në kohë për ta nxjerrë prej aty.
Shkak i aksidentit dyshohet të ketë qenë shpejtësia e lartë dhe një parakalim i gabuar.
Njoftimi i policisë:
Mëngjesin e sotëm, në Derven, Krujë, automjeti me drejtues shtetasin F. M. është përplasur me një furgon mallrash, me drejtues shtetasin L. M., 62 vjeç. Si pasojë janë dëmtuar dy drejtuesit e automjeteve, të cilët ndodhen në spital, nën kujdesin e mjekëve.
Grupi hetimor po punon për sqarimin e rrethanave të aksidentit.
