Grida Duma u shkëput ditën e djeshme nga politika aktive pas një dekade, duke dorëzuar mandatin e deputetes që e kishte fituar nën siglën e Partisë Demokratike në zgjedhjet e 25 prillit.
E teksa zërat janë që Duma do të angazhohet në botën e medias, madje duke drejtuar një emision politik në prime-time në Top Channel, ironia e fatit është se një tjetër moderatore e kanalit televiziv kombëtar do t’i zërë asaj vendin në Parlament.
Sipas përllogaritjeve të KQZ i takon ish-drejtueses së emision “Wake Up” dhe prurjes më të re të produksionit “Përputhen”, Oriela Nebiajt që të zëvendësojë Dumën.
Dje ishte ende e paqartë nëse Nebiaj do të pranonte të futej në Parlament duke u shkëputur nga angazhimet në televizion, por sot ajo vetë ka konfirmuar për “Panorama” se do të pranojë mandatin e deputetes.
Nebiaj kandidoi më 25 prill në qarkun e Tiranës, ku mori 5606 vota preferenciale. Ajo ishte renditur e 18 në listën e PD-së në qarkun e Tiranës, por pas rirenditjes në bazë të votave preferenciale ajo u ngjit një vend më sipër.
Megjithatë, para saj në radhë ishte Petrit Doda, por me ndryshimet e fundit të Kodit Zgjedhor, mandatin e ligjvënësit që lë një grua e merr po një grua.
Pas kërkesës për dorëheqje të Grida Dumës, pritet të mblidhet Këshilli i Mandateve në Kuvend për të shpallur vakancën.
Vakanca i dërgohet Komisionit Qendror të Zgjedhjeve, i cili brenda 48 orëve bën zëvendësimin.
Ndërkohë, sot pritet që të depozitojë dorëheqjen edhe Alfred Rushaj, i cili e argumentoi largimin nga jeta politike me arsye personale.
