Kryetari i Listës Serbe, Goran Rakiç tha se të shtunën, më 5 nëntor, do të propozojë largimin e serbëve nga institucionet në veri, përfshirë ato gjyqësore, të policisë dhe në institucione të tjera.
Sipas tij, serbët duhet të forcojnë dhe ndërtojnë institucionet e veta në veri, në bashkëpunim me Serbinë, shkruan REL.“Të gjithë ne kemi hyrë në institucionet e Kosovës sepse kjo ka qenë pjesë e Marrëveshjes së Brukselit, dhe duke pasur parasysh se Prishtina nuk i respekton marrëveshjet e nënshkruara, është e qartë se nuk kemi çfarë të kërkojmë në ato institucione sepse është e qartë se Prishtina shkel secilën prej tyre”, theksoi ai.
Rakiç u shpreh se institucionet në Prishtinë nuk kanë pasur të drejtë ta pezullojnë Gjuriçin nga puna, pasi tha se ai është zgjedhur nga serbët dhe katër kryetarët e komunave në veri, që banohen me shumicë serbe.
Gjuriç ka refuzuar që të zbatojë vendimin e Qeverisë sa i përket targave.
