Çështja e azilkërkuesve shqiptarë që mbërrijnë në Britaninë e Madhe me gomone, përveç përplasjeve politike që po prodhon midis qeverisë vendase dhe kryeministrit Edi Rama, apo nxitjes së urrejtjes te populli teksa mediat përdorin retorikën e krimit, është kthyer edhe në një dramë për emigrantët që ndjekin këtë rrugë dhe familjarët që i presin.
Këtë e tregon më së miri rasti i Arbenit, një emigranti të ligjshëm shqiptar me banim në Oksford, i cili në dëshpërim e sipër ka tentuar të ndalojë një autobus që po transportonte azilkërkues nga kampi i tejmbushur i Manston në Kent, për në hotele dhe qendrat e tjera të pritjes.
Sipas mediave britanike, ai kishte zbuluar se të afërmit e tij po mbaheshin në Manston, pasi kishte parë një foto të nipit të tij 8-vjeçar dhe dy vogëlushëve të tjerë në faqen e parë të gazetës britanike “Metro”.
Pasi udhëtoi nga Oksfordi ai u përpoq të hynte në një autobus ku ndodheshin emigrantët për të gjetur familjen e tij.
Arben Halili teksa u tregonte oficerëve dhe mediave foton e përhapur gjerësisht në rrjet, pas publikimit të artikullit për kushtet çnjerëzore ku po mbahen emigrantët, mësohet të ketë thënë: “Ky është nipi im!”.
Fotografia e faqes së parë tregonte disa fëmijë të ulur pas një gardhi me tel. Nipi i Arbenit thuhet se është mbajtur në Manston për tre javë, ku fëmijët kanë qenë mes mijëra njerëzve të detyruar të flenë në objektin e pajisur pa shtretër, pa ujë, ajër të pastër dhe pa tualete.
Manston është projektuar për të mbajtur deri në 1,600 emigrantë për jo më shumë se 24 orë, por të hënën kishte rreth 4,000 të ardhur me gomone në këtë qendër.
