Vetëm dy ditë kanë mbetur nga afati për dorëzimin e kandidaturave për kreun e ri të Prokurorisë së Posaçme Antikorrupsion (SPAK), që mbyllet në orën 00:00 të datës 2 nëntor.
Ditën e sotme në garë ka hyrë zyrtarisht edhe një tjetër kandidat. Mësohet se Prokurori Edvin Kondili ka depozituar kërkesën duke shprehur interes për të marrë drejtimin e organit të akuzës.
Edvin Kondili ka qenë prokuror i Krimeve të Rënda dhe e kaloi me sukses vettingun në 7 qershor të vitit 2019. Prokurori që hetoi trafikun e 613 kilogramë kokainë që u kapën në një kontenier me banane në portin e Durrësit, rezultoi se nuk kishte probleme me pasurinë, pastërtinë e figurës apo aftësitë profesionale.
Kondili ka qenë edhe një nga tre kandidatët në garën e parë për kreun e SPAK-ut, ku garoi me drejtuesin aktual Arben Kraja dhe prokurorin Altin Dumani. Asokohe ai ishte i vetmi që nuk kishte mbajtur asnjëherë poste drejtuese në organin e akuzës.
Deri tani ka shkuar në dy numri i kandidatëve, pasi pak ditë më parë Adnan Xholi u bë kandidati i parë që dorëzoi zyrtarisht kërkesën.
Xholi ka një karrierë mbi 20 vjeçare në prokurori dhe punon në Prokurorinë e Përgjithshme prej viti 2013, ndërsa është konfirmuar në detyrë duke kaluar vettingun vitin e kaluar.
Xholi ka qenë kandidat edhe në garën për kreun e Byrosë Kombëtare të Hetimit (BKH), mirëpo nuk i rezultoi fitues.
Ndërkohë, sa i përket kreut aktual të SPAK, Arben Krajas i përfundon mandatin në datën 19 dhjetor dhe në zyrë do të hyjë drejtuesi i ri. Kraja do të vijojë të mbetet prokuror i SPAK, pasi si mandati si përfaqësues i organit të akuzës është 9 vite ndërsa si drejtues zgjat vetëm 3 vite dhe kreu i SPAK nuk ka të drejtë rizgjedhjeje, pasi me ligjin në fuqi gëzon vetëm 1 mandat.
