Franck Ribery, që nga sot i thotë lamtumirë zyrtarisht futbollit. Në moshën 39 vjeçare ylli francez vendosi të mos zbresë më në fushë, kjo për shkak të problemeve fizike të shfaqura në fundin e sezonit të shkuar. Pjesë e Salernitanës në Serie A, tanimë francezi do marrë rolin e drejtuesit në klubin italian.
“Është fundi i një kapitulli si lojtar, por jo i historisë sime profesionale, mund të jeni të sigurt. Kështu që më duhet të them lamtumirë, për fillimin e një kapitulli të ri. Prandaj jam i detyruar të përfundoj karrierën time si lojtar profesionist këtu. Është fundi i një kapitulli fantastik në jetën time, por edhe një mundësi për të falënderuar të gjithë ata pa të cilët nuk do të isha kjo që jam sot: familja ime në fillim, që e bëri të mundur këtë. Shokët dhe trajnerët e mi, me të cilët ndava momente të pabesueshme dhe gëzime të pamata, pa harruar drejtuesit dhe stafin e klubeve në të cilat pata fatin të rritesha“, shkruan Ribery.
Nesër kampioni francez, i cili vendosi që në moshën 39-vjeçare të varë këpucët, do të përshëndetet nga tifozeria para ndeshjes ndaj Spezias.
