Vjosa Osmani priti në zyrën e saj mëngjesin e sotëm të dërguarin e posaçëm të Shteteve të Bashkuara për Ballkanin Perëndimor, Gabriel Escobar.
Pas përfundimit të takimit, Osmani deklaroi për mediat se i kishte shprehur të dërguarit të SHBA-së për Ballkanin angazhimin e Kosovës në përmbushjen e synimeve të përbashkëta në një kohë të vështirë për Europën.
“Kosova mbetet jashtëzakonisht e përkushtuar për të bërë gjithçka që mundet për të mbështetur aleatët tanë në mbrojtje të paqes dhe demokracisë”- tha Osmani e cila nënvizoi se diçka e tillë është reflektuar dhe në politikën e jashtme, në sanksionet ndaj Rusisë dhe mbështetjen për Ukrainën.
Ajo u shpreh se gjatë takimit u diskutua nevoja për të ecur përpara në procesin e dialogut.
Osmani shtoi se kishte theksuar se Kosova ka qenë gjithnjë pala konstruktive, por është e gatshme ta rrisë angazhimin për të intensifikuar procesin. Presidentja e Kosovës kishte shprehur gjithashtu shqetësimin për mosrespektimin e marrëveshjeve nga ana e Serbisë.
Ajo sqaroi se i ka adresuar Gabriel Escobar-in një sërë çështjesh të cilat në bashkëpunim me partnerët ndërkombëtar do të marrin zgjidhje.
