Indonezia ka njoftuar planet për të prishur stadiumin ku të paktën 131 tifozë futbolli vdiqën dhe qindra u plagosën në trazirën e shkaktuar.
Presidenti Joko Widodo tha se stadiumi Kanjuruhan në Malang do të rindërtohet sipas standardeve të sigurisë të vendosura nga organi drejtues i sportit FIFA.
Ai tha se vendi duhet “të transformojë tërësisht” mënyrën se si e menaxhon sportin. Widodo dha lajmin pas takimit me presidentin e FIFA-s, Gianni Infantino të martën.
Indonezia është vendosur të presë Kupën e Botës për U20 2023 dhe dyshja ranë dakord të formojnë një grup të përbashkët pune përpara eventit sportiv.
Duke folur së bashku me Widodo, shefi i FIFA-s tha se ishte e domosdoshme që tifozëve të pranishëm në turne t’u sigurohet një mjedis i sigurt.
“Ky është një vend futbolli, një vend ku futbolli është një pasion për më shumë se 100 milionë njerëz”, tha ai. “Ne u detyrohemi atyre që kur të shohin një ndeshje, të jenë të sigurt.”
Më 1 tetor, qindra tifozë vdiqën teksa u përpoqën të largoheshin nga stadiumi Kanjuruhan pas humbjes së skuadrës vendase Arema FC nga Persebaya Surabaya.
Gjashtë persona, duke përfshirë oficerë policie dhe organizatorë, po përballen me akuza penale për përplasjen mes policisë dhe tifozëve, e cila është një nga katastrofat më të rënda të stadiumit në botë.
Një hetim i publikuar javën e kaluar vendosi se incidenti tragjik ishte shkaktuar nga policia që hodhi gaz lotsjellës në tribuna – një masë e kontrollit të turmës e ndaluar nga FIFA.
