Sulmuesi Armando Dobra, i cili në të kaluarën ka qenë pjesë e përfaqësueseve të moshave deri në U21, po bëhet protagonist në futbollin anglez me fanellën e Çesterfilld. Sot, ai ka shënuar në Kupën FA, duke ndihmuar ekipin e tij që të kalojë në turin e pestë të turneut më të vjetër futbollistik në botë.
Në ndeshjen që Çesterfilld luante në transfertë ndaj Anstei Nomads, Dobra e nisi takimin si titullar dhe nuk vonoi shumë që të gjente golin e avantazhit përballë ekipit të kategorisë së 10 që kishte bërë mrekulli pas mrekullie duke arritur deri në këtë tur të FA Cup si asnjëherë më parë.
Ai shënoi një gol me kokë pas një krosimi nga e djathta, duke i dhënë avantazhin 1-0 ekipit të tij që në minutën e 9 të ndeshjes e duke ia bërë më të thjeshtë gjithçka ekipit që gjeti më pas edhe dy herë të tjera golin duke fituar me shifrat 3-0.
