Sekretari i Përgjithshëm i Këshillit të Ministrave, Engjëll Agaçi është paraqitur pasditen e sotme në ambientet e Prokurorisë së Posaçme Antikorrupsion (SPAK).
Është ende e paqartë arsyeja pse Agaçi është thirrur nga SPAK, por ai ka folur para gazetarëve duke thënë se nuk ka ndonjë koment për të dhënë.
Kujtojmë se Agaçi është një nga njerëzit më të afërt dhe të besuar të kryeministrit Edi Rama dhe opozita e akuzon se ka qenë i përfshirë në aferën e inceneratorëve.
Agaçi u paraqit edhe në Komisionin Hetimor për Inceneratorët më 22 shkurt të këtij viti, ku u përplas me deputetët e opozitës, të cilët e akuzojnë se ka firmosur të gjithë procedurat ligjore brenda 24 orëve në shkelje flagrante të ligjit.
Asokohe, deputetët e opozitës kërkuan shpjegime në lidhje me vendimin e qeverisë për dhënien e lejes te koncesionari për ndërtimin e inceneratorit të mbetjeve në një ditë kur është hapur oferta dhe firmosjen e 17 vendime brenda një dite.
Agaçi u mbrojt duke deklaruar se kontrata është publikuar në regjistrin kombëtar dhe procedurat kanë nisur që në korrik të vitit 2014.
