Një skandal është zbuluar në Gjykatën e Tiranës, ku rreth 300 dosje të viteve nga 2008 -2015 nuk i janë dorëzuar për rekurs Gjykatës së Lartë.
Skandali është zbuluar disa javë më parë teksa një pjesë e dosjeve po spostoheshin për në magazinat në Lundër ku dhe do të arkivohen.
Bëhet fjalë për rreth 299 dosje civile dhe 1 penale që i përkasin viteve 2008 -2015 ndaj të cilave është ushtruar rekurs. Mësohet se dosjet kanë qenë për çështje gjyqësore të ndryshme për trashëgimi, për konflikt pronash, përpjesëtim pasurie, largime nga puna, përfitim pensioni dhe dhjetëra çështje të tjera që duhet të çoheshin për rekurs në Gjykatën e Lartë.
E ndërsa të interesuarit prisnin që çështja të ecte më tej, dosjet ishin harruar nga personeli i gjykatës në arkiva.
Menjëhere sapo është venë në dijeni të këtij fakti, kryetarja e gjykatës Enkelejdi Hajro ka urdhëruar marrjen e masave për të vënë në lëvizje rekurset si dhe largimin e personave përgjegjës, kryesekretares Mimoza Cenaj dhe një sekretareje. Në urdhrin e shkarkimit, të firmosur nga kryetarja e gjykatës thuhet se Mimoza Cenaj nuk ja ka komunikuar fshehjen e dosjeve titullarëve. Sipas këtij urdhri 300 dosjet që duhet të çoheshin për rekurs nuk janë regjistruar asnjëherë në sistemin elektronik dhe statusi i tyre është përfundimtar.
Gjithashtu për kryesekretaren po përgatitet edhe një kallëzim penal që do të depozitohet në Prokurorinë e Tiranës për shpërdorim detyre.
Veç kallëzimit penal, ndaj dy vartesve të shkarkuara, kreu i Gjykatës së Tiranës ka urdhëruar dhe kontrollin e të gjitha procedurave për dosjet e lidhura me rekurset në Gjykatën e Lartë përgjatë periudhës 2008-2015.
Skandali i fshehjes të dosjeve në gjykatën e Tiranës, ka bërë që të nisin verifikimet edhe në gjykatën e Lezhës dhe atë të Korçës.
