Real Madrid është mjaftuar me një gol ndaj Getafes, në ndeshjen e vlefshme për La Liga (0-1). Los Blancos zhbllokuan takimin që në minutën e katërt. Luka Modriç dërgoi një krosim perfekt në zonë, teksa Militao, edhe pse nuk është një sulmues, koordinohet mjaft mirë dhe realizon.
Ekipi i Flores nuk qëndroi duarkryq dhe reagoi pak minuta më vonë. Borja Mayoral shërbehet mjaft mirë në zonë, por 25 vjeçari spanjoll nuk prek dot topin për ta shtyrë në rrjetë, për çështje centimetrash.
Mungesa e Karim Benzema u vu re shumë. Madrilenët nuk kishin një pikë kyçe për të udhëhequr skuadrën në sulm, me Rodrygon që dukshëm po haste vështirësi.
Tchouameni provon nga distanca në minutën e 32-të, por gjen vetëm trupin e kundërshtarit.
Federico Valverde kishte radhën për të tentuar brenda zonës, por gjuajtja e tij ishte mjaft e keqe, duke mos sjellur asgjë produktive.
Borja Mayoral mbetej rrezik konstant për portën e mbrojtur nga Lunin dhe në fundin e fraksionit, Militao detyrohet të nxjerrë një top që po shkonte drejt tij në këndore, për të mos rrezikuar më shumë.
Në pjesën e dytë vlen të përmendet vetëm një gol i Rodrygos, i anulluar për pozicion të parregullt.
