Ura e ngushticës së Kerçit, një simbol i pushtimit rus në Ukrainë, që nisi me aneksimin e Krimesë vite më parë, është shkatërruar në pjesën më të madhe të trasesë nga një shpërthim i fuqishëm.
Kjo urë është pika lidhëse e Krimesë me kontinentin dhe pikë furnizimi logjistike për forcat ruse në gadishull dhe për territoret ukrainase të pushtuara nga rusët ku u shpall referendumi si Kherson, Luhansk dhe Donetsk.
Sipas agjencisë ruse së lajmeve RIA, një zjarr shpërtheu në një rezervuar karburanti në urë, ndërsa videot e ngjarjes tregojnë një tren që digjet dhe pjesë të rrugës të shembura.
Të paktën dy vagona hekurudhore të një treni janë përfshirë nga flakët, ndërsa shihet tym i zi ngado.
Dëshmitarët në zonë thanë se shpërthimi që ndodhi rreth orës 6 të mëngjesit teksa një tren po kalonte urën, u dëgjua në disa kilometra largësi.
