Reforma Territoriale-Administrative dhe projektligji i dorëzuar në Kuvend nga grupi i deputetëve të Enkelejd Alibeajt, është motivi që ka shtyrë ambasadoren e SHBA, Yuri Kim drejt selisë së Kuvendit mesditën e sotme.
Kim po zhvillon një takim me deputetët e PD, Enkelejd Alibeaj, Dhurata Çupi, Jorida Tabaku, Grida Duma, Agron Gjekmarkaj dhe Gazmend Bardhi, ndërkohë që përkrah saj janë rreshtuar edhe kolegët e selive diplomatike më në zë në Tiranë.
Takimi ka nisur prej orës 13:00 dhe diskutimet do të jenë kryesisht të fokusuara te raporti final për ndryshimin e hartës së bashkive, votuar me konsensus në 2015 nga forcat politike.
Grupi i Alibeajt në draftin e propozuar kërkon shtimin e 31 bashkive, duke shkuar nga 61 që janë aktualisht në 94 në total.
Sipas propozimit, në qarkun Berat shtohen 2 bashki, në Dibër 4, në Durrës 2 bashki, në Elbasan 3, në qarkun Fier 4, Korçës i shtohen 5 bashki, Kukësit 2, Lezhës 4 dhe Vlorës 4 bashki të reja.
Sipas tyre edhe Tirana duhet të ketë 3 bashki më shumë, duke shtuar Farkën, Dajtin dhe Kasharin. Ndërsa sipas tyre, qarku i Gjirokastrës dhe i Shkodrës duhet të mbeten të pandryshuar.
Grupi i Alibeajt gjithashtu është pro ndarjes së vendit në 3 ose 6 rajone.
