Më 27 shtator në mbledhjen e Kryesisë së Partisë Socialiste, Edi Rama e “zhveshi” nga të gjitha funksionet në parti të përkëdhelurin e tij Arben Ahmetaj, duke i hequr nga duart menaxhimin e qarkut të Vlorës.
Duke u justifikuar me përgatitjen e partisë për zgjedhjet lokale të 2023, kryeministri e hodhi automatikisht Ahmetajn në “gojën e ujkut” (SPAK), pasi dosja e inceneratorëve është e lidhur fort me emrin e ish-ministrit të Financave.
Kryeministri ia delegoi Vlorën, Blendi Klosit, i cili ka zbritur pas një jave në terren dhe është prezantuar sot me strukturat nga Sekretari i Përgjithshëm i PS, Damian Gjiknuri.
Me mikun e “çunave problematikë” në krah, Klosi ashtu siç edhe Rama e theksoi bëhet lojtari kryesor që do të drejtojë formacionin e qarkut bregdetar në Vendoret 2023, me Ahmetajn që është bërë zyrtarisht sot pjesë e historisë në Vlorë.
Klosi dhe Gjiknuri nuk mundën t’i shpëtonin një pyetjeje të gazetarëve për largimin e bujshëm nga “formacioni” i PS, të “Tigrit” të Financave, por me diplomaci u përpoqën të shmangnin dhënien e më shumë detajeve seç ju lejon shefi i tyre, Edi Rama.
“Për këtë është përgjigjur edhe Kryeministri. Këto janë lëvizje normale përpara para fushatave zgjedhore, ku secili merr pozicionin e tij si lojtar, që ekipi të japë maksimumin. Ahmetaj është lajmëruar për takimin e sotëm por mesa di ka qenë i angazhuar me punë. Besoj se Klosi do të vazhdojë punët e mira të nisura për sa i përket mirëmenaxhimit dhe mirëorganizimit politik të këtij qarku”, tha Gjiknuri.
Ndërkohë, përveç Arben Ahmetajt në takimin me strukturat për t’i prezantuar Klosin, mungonte edhe i përjashtuari i madh i Vlorës, kryebashkiaku Dritan Leli, të cilin kryeministri nuk lë konferencë pa e sulmuar dhe denigruar publikisht.
Ndërkohë, Klosi ishte shumë teknik në diskutime, teksa para gazetarëve theskoi se do të nisë punën në terren për të përgatitur fushatën elektorale.
“Shumë shpejt do të fillojmë procedurat për vlerësimin e të gjithë kryetarëve tanë në të 61 bashkitë e vendit, ku nuk do të jetë struktura e partisë që do të bëjë vlerësimin por do të jetë ajo çfarë kanë dhënë për qytetet që kanë drejtuar dhe sesi qytetet kanë mirëpritur ose jo drejtuesit e mandatuar nga Partia Socialiste”, tha ai.
