Në ditën kur zv.drejtori i Shërbimit Informativ Shtetëror, Oljan Kanushi do të duhet të dilte para deputetëve në Komisionin e Sigurisë Kombëtare për të raportuar në lidhje me sulmin kibernetik, grupi i hakerave HomelandJustice e sfidoi sërish shtetin duke nxjerrë online databazën e sistemit “MEMEX” të policisë, që mbart të dhëna mbi personat e dyshuar për ngjarje kriminale dhe vepra të ndryshme penale.
Publikimi i këtyre të dhënave, ku del edhe dosja e të shumëkërkuarit të drejtësisë Ervis Martinaj, ka bërë që mbledhja e komisionit të startojë me debate, pasi përfaqësuesit e opozitës kanë kërkuar të paraqitet vetë kreu i SHISH.
Në vijim tonet u ngritën pasi mazhoranca kërkoi që seanca dëgjimore të bëhej me dyer të mbyllura, por kjo kërkesë u kundërshtua nga opozita, e cila insistoi që me praninë e medias t’u tregohet shqiptarëve fytyra e vërtetë e shtetit.
Edhe Kanushi mbështeti kërkesën e mazhorancës duke thënë që seanca të zhvillohet me dyer të mbyllura me argumentin se çdo çështje që do të diskutohej është 100% sekrete dhe nuk duhet të dalë në publik.
“Do të lutesha të merrnit një vendim duke qenë se 100% të çështjeve në këtë seancë janë të nivelit sekret. Vetëm për këtë aspekt dhe jo për diçka tjetër”, u shpreh zv.kryetari i SHISH.
Po përgjigja ishte e menjëhershme nga Sekretari i Përgjithshëm i PD, Flamur Noka, i cili tha: “Mund të funksiononi edhe si bandë, por gojën nuk ia mbyllni askujt”.
Ndërkohë, kryetari i komisionit Nasip Naço i hodhi benzinë zjarrit duke u kërkuar të gjithë deputetëve që të dorëzojnë telefonat, duke tentuar të shmangë çdo rrjedhje informacioni në media nga kjo mbledhje.
DEBATI:
Ervin Salianji: Jemi në një situatë të rëndë kur të gjithë të dhënat po përfundojnë në publik. Duhet t’i japim siguri qytetarëve shqiptarë që jemi në rrugën e duhur dhe institucionet po funksionojnë.
Xhemal Qefalia: Nuk jemi han me dy porta për të nxjerrë në publik informacionet sekrete dhe tepër sekrete. Secili deputet është i përgjegjshëm. Duhet të operoni menjëherë me vazhdimin me dyer të mbyllura të kësaj seance.
Ferdinand Xhaferraj: Ky është skandali. E dija që ka një VKM. Ky është skandali. Jam deputet me eksperiencë. Nuk e ke pronën tënde. Certifikatën e kërkon Rama që e mbushi Kuvendin me kriminelë. Deri në vitin 2013 nuk është kërkuar.
Nasip Naço: Bëhuni gati që të dorëzoni edhe celularët!
Flamur Noka: Do i dorëzojmë të gjitha. Do i dorëzojmë ça të kemi, para jo se paratë i keni rrujt. Ju i kërkoni deputetëve të dorëzojnë gjithçka.
Nasip Naço: Pse keni frikë nga rregullat?
Flamur Noka: Mirë bën që i kërkon deputetëve të dorëzojnë celularët sepse sot shqiptarët kanë dorëzuar në duart e hakerave çdo të dhënë. Sepse ka një qeveri që vetëm vjedh dhe nuk ruan sistemet. Ki durim pak. Çështja pse është thirr kreu i SHISH është mjaft sensitive për ne dhe për çdo qytetar shqiptar. Nuk ka asnjë sekret edhe pse mundoheni ta kanalizoni në linja të tilla.
