Policia e Shtetit ka qenë në monitorim të vazhdueshëm të derbit të kryeqytetit Tirana-Partizani, i cili u luajt sot në fushën e stadiumit “Air Albania”.
Për të parandaluar përplasjet e dhunshme mes tifozëve, policia ka qenë nën survejim të tribunave respektive në çdo sekondë nëpërmjet kamerave të sigurisë.
Ndërkohë qësfida luhej, Uniformat Blu publikuan në rrjetet sociale disa momente nga puna e efektivëve në sallën operative. Sipas policisë, çdo tifoz që kryen veprime të kundraligjshme do t’u përcillet shërbimeve të tjera të policisë, të cilat më pas bëjnë edhe shoqërimin.
“Live nga Salla e monitorimit të kamerave të ambienteve të brendshme dhe të jashtme të stadiumit “Air Albania”.Punonjësit e Policisë së DVP Tiranë duke evidentuar çdo tifoz që kryen veprime të kundraligjshme dhe duke jua përcjellur shërbimeve të tjera të Policisë, me qëllim shoqërimin e tyre”, shkruan Policia e Shtetit në Facebook.
