Rusia u trondit sot nga një sulm me armë në një shkollë, ku 13 viktima u shënuan, mes të cilëve shtatë fëmijë, ndërsa 14 persona mbetën të plagosur.
Sipas mediave personi i armatosur që ka kryer sulmin ka qenë i frymëzuar nga të shtënat famëkeqe në shkollën “Columbine” në Colorado të SHBA në vitin 1999.
Sulmi ndodhi në shkollën nr. 88 në Izhevsk – kryeqyteti i Republikës së Udmurtit të Rusisë, afërsisht 600 milje në lindje të Moskës dhe viktimë mbetën edhe dy roje të sigurisë.
Nxënësit dhe mësuesit u panë të strukur nën tavolina dhe të fshehur në dollapët e klasave të tyre, ndërsa personi i armatosur kalonte nëpër salla, në pamjet tronditëse që qarkulluan në rrjet.
Agresori më pas u identifikua si Artyom Kazantsev, një ish-nxënës i shkollës nr. 88, i lindur në vitin 1988. Pistoletat e përdorura në sulm prej tij mbanin zinxhirë çelësash të punuar me dorë për të nderuar sulmuesit e “Columbine”, Eric Harris dhe Dylan Klebold.
Pasi përfundoi masakrën, agresori kreu vetëvrasje dhe u gjet gjatë operacionit të policisë, teksa mbante në duar dhe trup një arsenal armësh dhe dy pistoleta, ndërsa në imazhin e kufomës që qarkulloi në rrjet dallohet një shenjë dalluese naziste të qepur në këmishën e tij.
Ndërkohë, para se të kryente sulmin, Kazantsev kishte postuar në rrjetet sociale një mesazh, që më pas u ripostua masivisht në Telegram.
“Ajo që ndodhi nuk ishte një sulm terrorist. Si e vetmja arsye për atë që ndodhi, ju kërkoj të përmendni urrejtjen. Unë nuk jam anëtar i asnjë organizate ekstremiste, nuk kam kërkesa politike”, shkruante agresori.
Por pavarësisht justifikimit të tij paraprak, Presidenti rus Vladimir Putin denoncoi të shtënat si një “sulm terrorist çnjerëzor”.
“Presidenti uron shërimin e të plagosurve si rezultat i këtij sulmi terrorist çnjerëzor”, u tha gazetarëve zëdhënësi i Kremlinit Dmitry Peskov.
