Bordi i krijuar me vendim qeverie për caktimin e çmimeve të karburanteve, ka njoftuar këtë të Shtunë rritjen e çmimit të naftës me 7 lekë për litër.
Kështu, nafta do të shitet me 223 lekë/litri në pompa, nga 216 lekë që ishte më parë. Benzina do të shitet 194 lekë/litri, aq sa më parë. I pandryshuar mbetet dhe çmimi i gazit në 78 lekë/litri.
Çmimet e caktuara nga bordi do të hynë në fuqi sot (24 shtator) nga ora 18:00 dhe do të jenë të vlefshme deri në mbledhjen e ardhshme.
Në një njoftim zyrtar shpjegohet se këto çmime janë si rezultat i lëvizjes së çmimeve në bursën Platts Mediteran, “ku rritja e naftës vjen për shkak të rritjes së dy faktorëve: bursa +31 usd ton nga data 15 Shtator; kursi dollarit nga 117.2 $ në afërsisht 120 $”.
Ndërsa për benzinën, shpjegohet se është ulur bursa me 26$/ton, por është rritur kursi i këmbimit të dollarin me 3 lekë – pra ulja e bursës kompensohet me rritjen e kursit prandaj nuk ka lëvizje çmimi.
