Kryetari i Partisë Demokratike, Sali Berisha ashtu siç kishte paralajmëruar është duke zhvilluar një bashkëbisedim virtual me ndjekësit e tij në rrjetin social Facebook, ku po i përgjigjet pyetjeve të qytetarëve.
Ish-kryeministri ka hyrë drejt e në temë teksa është pyetur për mënyrën sesi do të rrëzohet pushteti i Edi Ramës dhe ka premtuar se do të ketë protesta të gjithanshme në të gjithë Shqipërinë.
“E vërteta është se polarizimi në këtë vend po rritet me shpejtësi dhe shtresa e mesme po shkon drejt asgjësimit, të varfrit po bëhen gjithnjë e më të varfër. Protesta janë rruga për të cilat është përcaktuar Fronti për Shpëtimin e Shqipërisë. Protestat e gjithanshme do jenë rrugë për të rikthyer në Shqipëri, shpresën, votën e lirë dhe për të dalë nga ky regjim absolutar, sot i vetmi në Europë pas atij të Putinit dhe Lukashenkos”, tha Berisha.
Në vijim kreu i selisë blu dha garancinë që mijëra qytetarë po kërkojnë prej tij për të ndalur babëzinë e qeverisë Rama, duke thënë: “Ju garantoj se do të fillojnë shumë shpejt. Mund të jenë shtyrë, por edhe shtyrja e tyre bëhet për shumë aspekte, e padurueshme”.
Ndërkohë, vota e emigrantëve është një tjetër çështje që i është shtruar kreut të PD përmes një pyetje nga ndjekësit e tij. Berisha është përgjigjur duke premtuar se diaspora shqiptare do të votojë në zgjedhjet e ardhshme.
“Ne do bëjmë gjithçka që diaspora shqiptare të votojë në zgjedhjet e ardhshme. Por do bëjmë gjithçka për një bashkëpunim sa më të ngushtë me diasporën shqiptare. Do krijojmë të gjitha mundësitë që diaspora të investojë në Shqipëri, të angazhohet në institucionet administrative, zyrtare politike të vendit. E konsiderojmë diasporën një faktor madhor për një Shqipëri të zhvilluar me një të ardhme të sigurtë”, deklaroi ish-kryeministri.
